Balentziagako 20 alokairuko zuzkidura-etxebizitza inguru garatzeko oinarrizko proiektua idazteko zerbitzua lizitatu du Udalak.
Getariako Udalaren eta Eusko Jaurlaritzaren artean adostutakoaren arabera, eta etxebizitzen proiektua azkartu eta errazteko helburuarekin, Udalak oinarrizko proiektua idatziko du, eta Eusko Jaurlaritzak, 2027tik aurrera, dagozkion izapideak egin eta eraikina gauzatzeko prozesuarekin aurrera egingo du.
Proiektuaren helburua gaur egun dagoen Euskaltxeta eraikina eraitsi eta haren ordez 20 alokairuko zuzkidura-etxebizitza inguru eta udalaren jabetzako aparkalekuak izango dituen eraikin berria garatzea da.
20 alokairuko zuzkidura-etxebizitza inguru
Oinarrizko proiektuaren helburua da 20 zuzkidura-etxebizitza inguruko programa garatzea. Baldintza teknikoek zehazten dute etxebizitza-kopuruaren gainetik proposamenaren kalitatea lehenetsiko dela. Aurreikuspenaren arabera, unitateen %60-70ek logela bakarra izango dute —12 eta 14 etxebizitza artean— eta %30-40k bi logela —6 eta 8 artean—.
Promozioa alokairura bideratutako zuzkidura-etxebizitzek osatuko dute, eta proiektuak bereziki kontuan hartu beharko du eraikinaren bizitza erabilgarrian mantentze-kostuak ahalik eta gehien murriztea. Horretarako, bizitza erabilgarri luzeko eta mantentze-lan txikiko eraikuntza-sistemak lehenetsiko dira.
Udalaren jabetzako aparkalekuak
Sestra azpiko bi solairuetan udalaren jabetzako aparkaleku autonomoak aurreikusten dira. Proiektuak ahalik eta plaza-kopuru handiena proposatu beharko du, eta garajeetarako sarbidearen inguruan Plan Berezian jasotako aukerak aztertu beharko dira: Herrerieta kaletik sarbidea edo ondoko aparkalekuarekin lotura, besteak beste.
Eraikin jasangarria eta energia-eraginkorra
Baldintza teknikoek eraikuntza jasangarriaren, diseinu bioklimatikoaren eta energia-eraginkortasunaren irizpideak ezartzen dituzte oinarrizko proiektua idazteko.
Besteak beste, proiektuak kontuan hartu beharko ditu:
- Eraikinaren orientazioa eta diseinu bioklimatikoa.
- Argiztapen eta aireztapen naturalaren aprobetxamendua.
- Isolamendu termikoa eta zubi termikoen murrizketa.
- Energia berriztagarrien erabilera.
- Errendimendu handiko instalazio eta sistemak.
- Eraikinaren mantentze-lanak eta bizi-zikloaren kostuak murrizteko soluzioak.
Gainera, proposamen arkitektonikoek A energia-kalifikazioa lortu beharko dute emisioetan, lehen mailako energia ez-berriztagarriaren kontsumoan eta berokuntza-eskarian.
Irisgarritasun unibertsala eta bizigarritasuna
Irisgarritasunari dagokionez, etxebizitza guztiek irisgarritasun-baldintzak bermatu beharko dituzte, ez bakarrik egokitutako etxebizitzen erreserban sartzen direnek. Baldintza horiek, besteak beste, sarbidean, komun batean, sukaldean, egongela-jangelan eta logela batean bermatu beharko dira.
Igogailu publikoarekin lotura
Oinarrizko proiektuak kontuan hartu beharko du Balentziagaren ondoan aurreikusitako igogailu publikoarekiko lotura. Igogailuaren pasabidea eraikin berriaren beheko solairuan sortuko den atzerapen-espazioarekin lotzea aurreikusten da.
40.000 euroko lizitazioa
Oinarrizko proiektua idazteko zerbitzuaren lizitazioaren oinarrizko aurrekontua 40.000 eurokoa da, BEZa barne, 33.057,85 euro gehi 6.942,15 euroko BEZa. Kontratuaren iraupena bi hilabetekoa izango da, kontratua formalizatu eta hurrengo egunetik aurrera.
Kontratazioa prozedura ireki sinplifikatuaren bidez eta lizitazio elektronikoaren bidez egingo da. Esleipenean, memoria teknikoak 45 puntu izango ditu, prezioak beste 45 eta lanen irismeneko gainprestazioek 10 puntu.
Horrela, Getariako Udalaren eta Eusko Jaurlaritzaren arteko adostasunaren baitan, Udalak oinarrizko proiektua prestatuko du, eta Eusko Jaurlaritzak, 2027tik aurrera, dagozkion izapideak egin eta eraikinaren gauzatze-prozesuarekin aurrera egingo du.
