150 getariarrek baino gehiagok emango diote bizia aurtengo Elkanoren Lehorreratzeari.

Mikel Larrañaga izango da lehen aldiz Elkano antzeztuko duena, eta emakume batek parte hartuko du lehen aldiz 18 europar tripulanteen artean.

Abuztuaren 7an ospatuko da berriro ere Getariako ekitaldirik esanguratsuenetako bat den Elkanoren Lehorreratzea. Aurtengo edizioak, gainera, esanahi berezia izango du, aurten 500 urte betetzen baitira Juan Sebastian Elkano kapitaina hil zela.

Hori dela eta, aurtengo kartelaren leloak gogorarazten duen bezala, “500 urte joan… eta itzuli”, Elkanoren memoria eta ondarea berriro ere Getariara itzuliko dira herritarren eskutik.

Eta itzulera horri hasiera emango dion ontzia ere ezaguna izango da getariarrentzat: aurten ere, Veracruz Carabela Portugesa izango da Juan Sebastian Elkano eta bere tripulazioa Getariako portura ekarriko dituena, Lehorreratzearen unerik ikusgarrienetako bati hasiera emanez.

Lehorreratzearen aurkezpena Zarautz Jauregian egin da, bertan dagoen “Kapitaina. Juan Sebastian Elkano” panelaren ondoan. Izan ere, panelak jasotzen duen bezala, munduari bira balentria kolektiboa izan zen: hemezortzi europar eta hiru asiar iritsi ziren, akituta baina bizirik, balentria hura posible egin zuen getariarraren gidaritzapean.

Ideia hori bera da, hain zuzen ere, Lehorreratzearen lehen zatiak irudikatu nahi duena: bidaiaren gogortasuna, urteetako sufrimendua eta nekea, baina baita helburu komun baten alde elkarlanean aritu zen talde baten indarra ere. Elkano buru zutela, ezinezkoa zirudiena posible egin zuten, eta horregatik iristen dira Getariara akituta, baina bizirik; nekatuta, baina garaile.

Lehorreratzearen beste elementu bereizgarrietako bat bost kontinenteen presentzia da. Aurten ere, adin eta jatorri desberdinetako herritarrek irudikatuko dituzte kontinenteak, munduak duen aniztasuna balorean jarriz eta errespetua, elkarbizitza eta elkarrenganako ulermena bezalako balioak azpimarratuz.

Aurtengo edizioak bi berritasun nagusi izango ditu. Batetik, Mikel Larrañaga izango da lehen aldiz Juan Sebastian Elkano antzeztuko duena. Horrez gain, hemendik aurrera Elkano antzeztu nahi duten herritarrek beren burua aurkezteko aukera izango dute, betiere aurrez Lehorreratzean tripulante gisa parte hartzen ari badira.

Bestetik, lehen aldiz, mundu bira amaitu eta Getariara itzuli ziren 18 europarrak irudikatzen dituzten tripulanteen artean emakume batek parte hartuko du, Saioa Etxeberria.

Guztira, 150 getariarrek baino gehiagok emango diote bizia aurtengo Elkanoren Lehorreratzeari, tripulante, kontinenteetako ordezkari, karrozetako partaide, herriko bandako kide, elizako koruko abeslari eta ekitaldiaren antolakuntzan eta garapenean lanean ariko diren boluntarioak batuz.

Azkenik, antolakuntzak gogorarazi du Elkanoren Lehorreratzea ez dela soilik antzezlan bat, baizik eta herri oso baten parte-hartzearekin eraikitzen den ospakizuna. Gaur gaurkoz, 52 boluntariok eman dute dagoeneko izena ekitaldiaren antolakuntzan eta garapenean laguntzeko, baina oraindik ere laguntza gehiago beharko denez, antolakuntzak herritarrei dei egiten die parte hartzera eta boluntario gisa animatzera, herriaren ekitaldi berezi hau guztion artean eraikitzen jarraitzeko.

ELKANOREN LEHORRERATZEA 2026 – ANTOLAKETA ETA OHARRAK

🕔 17:00
Lehorreratzearen hasiera

🚧 15:30etik aurrera ERREPIDEAK ITXITA egongo dira ibilgailu pribatuentzat

🏠 Herrian bizi direnek Mia aldetik sartu ahalko dute.

🚗 Errepide nagusitik gora garajea dutenek beren garaje edo aparkalekuetan aparkatu ahalko dute.

➡️ Gainerako herritarrak Igarategi industriagunean (Indaux) aparkatzera bideratuko dira, Akerregi auzotik sartuta.

🚌 Gomendioa:
✔️ Garraio publikoa erabiltzea.
✔️ Salbatore jaietako giroaz presarik gabe gozatzea.

⛪ ELIZAKO PASARTEA BERTATIK BERTARA IKUSTEKO

📝 Aurrez izena eman beharko da.

📍 Izen-ematea Getariako Turismo Bulegoan egingo da.

⚠️ Edukiera mugatua izango da.

📺 BERDURA PLAZA

➡️ Pantaila bat jarriko da Lehorreratzea zuzenean jarraitu ahal izateko.

♿👵 Herriko adinduek eta ezinduek lehentasuna izango dute gune honetan, ekitaldia ahalik eta pertsona gehienentzat irisgarria izan dadin.