Getariako Udalak Iturzaeta eskolako hobekuntzak eta Malkorbeko izozki-postua lizitaziora atera ditu.

Getariako Udalak gaur bi lizitazio berri argitaratu ditu, herriko azpiegiturak hobetzeko eta zerbitzuak indartzeko helburuarekin.

Lehenik eta behin, Iturzaeta eskolako hobekuntza lanen lizitazioa jarri da martxan. Lizitaziorako oinarrizko aurrekontua 157.964,29 eurokoa (BEZ barne) da, eta obrak esleipendunak gauzatu beharko ditu, gehienez 8 asteko epean eta udako garaian, ikasleak eskolan ez daudenean. Lanen nondik-norakoak Juan Antonio Aranburu Aizpuruk arkitekto teknikoak idatzi du.

Aurreikusitako esku-hartzeen artean daude fatxadako lanak, balkoietako hobekuntzak, bajanteen egokitzapena, hainbat ateren berrikuntza, eskailerako konponketak eta beluxaren instalazioa. Horrez gain, Udalak lan hauek Eusko Jaurlaritzarekin hitzarmen bidez finantzatu ditu, %60ko finantziazioa lortuta. Esku-hartze honen bidez, ikastetxeko instalazioak eguneratu eta egokitu nahi dira, ikasle eta irakasleentzako espazioak erosoagoak, seguruagoak eta egokiagoak izan daitezen.

Bestetik, Malkorbe hondartzan izozki-kaxeta jartzeko lizitazioa ere atera da. Ekimen honen bidez, udako denboraldian hondartzan eskaintza osagarri bat jartzea bilatzen da, erabiltzaileei zerbitzu hobea eskainiz eta aisialdi-gunea aberastuz.

Lizitazioaren berrikuntza nagusietako bat kaxeten diseinuari dagokio: zura lehenetsiko da, baina beste material batzuk ere onartuko dira baldin eta udalaren irizpide estetikoak betetzen badituzte (adibidez, zuraren imitazioa dutenak). Ez dira onartuko publizitatea edo kolore deigarriak dituzten etxolak, ingurunearekin bat datorren irudia bermatzeko.

Halaber, lehentasun-irizpide argiak eta erabakigarriak ezarri dira lizitazioan parte hartzen duten eskaintzen baloraziorako, tokiko ekoizpena eta kalitatezko artisautza sustatzeko helburuarekin. Ildo horretan, honako hiru talde hauek bereizi dira:
I. taldea: Getarian ekoitzitako helatu artisanalak saltzen dituzten enpresak.
II. taldea: Helatu artisanalak ekoizten dituzten enpresak.
III. taldea: Gainerako enpresak.

Azkenik, lizitazioei buruzko informazio guztia udalaren kontratatzailearen profilean kontsulta daiteke: https://getaria.eus/kontratatzailearen-profila/