Getariako alde zaharreko argiteria LED sistemara aldatzeko lanak hasi dira.
Getariako Udaleko langileak ari dira alde zaharreko argi-puntuak berritzen.
Getariako Udaleko langileak alde zaharreko argiteria publikoa LED sistemara egokitzeko lanekin hasi dira. Jarduketa Udalaren 2022-2030 Klima eta Energia Planean aurreikusita dago, energia-kontsumoa murrizteko, argiteria publikoaren eraginkortasuna hobetzeko eta, ondorioz, Udalaren gastu energetikoa murrizteko helburuarekin.
Lanei ekin aurretik, argiteria berritzeko azterketa teknikoa egin zen, alde zaharreko argi-puntuak eta argiztapenaren ezaugarriak aztertzeko eta LED teknologiara egokitzeko beharrak zehazteko.
Lanak udal langileak ari dira egiten, eta luminariak kontratazio-prozeduraren bidez eskuratu dira. Luminariak hornitzeko kontratuaren aurrekontua 54.934 eurokoa da, BEZa barne; instalazio-lanak, berriz, Udaleko langileek egingo dituzte.
Gainera, luminariak, instalatu ondoren, telegestio-sistema ezartzeko prestatuta egongo dira. Horrela, datorren urtean sistema hori txertatzeko aukera izango du Udalak, argiteria publikoaren kudeaketa eta kontrola hobetzeko.
LED teknologiara aldatzeak energia-eraginkortasuna hobetuko du, eta argiteria publikoaren energia-kontsumoa murriztearekin batera, aurrezpen ekonomikoa ere ekarriko dio Udalari. Jarduketa hau Getariako Udalak klima-aldaketaren aurrean hartutako konpromisoaren eta energia-trantsizioan aurrera egiteko lanaren barruan kokatzen da.
