Getariak urtebetez eten ditu turismo-ostatu berrietarako lizentziak; neurria gaur sartu da indarrean.
Udalbatzarrak aho batez onartu du neurria, EH Bilduren aldeko 6 botoekin eta EAJren 5 botoekin, HAPO berria lantzen den bitartean ostatu- eta turismo-ostatu erabileretarako lizentzia berriak urtebetez eteteko; erabakia gaur argitaratu da Gipuzkoako Aldizkari Ofizialean (GAO).
Getariako Udala Hiri Antolamenduko Plan Orokor berria lantzen ari da, eta prozesu horren baitan, ostatu- eta turismo-ostatu erabilerak ezartzeko, handitzeko edo intentsifikatzeko lizentzia berriak urtebetez etetea onartu du. Neurria udalerri osoan aplikatuko da, HAPO berriak erabilera horien araubidea modu egokian aztertu eta zehaztu ahal izan dezan.
Haritz Alberdi Getariako alkateak azpimarratu duenez, “neurri honen helburua Getariaren etorkizuneko hiri-eredua modu ordenatuan eta orekatuan lantzea da”. Alkatearen esanetan, “HAPO berria aukera garrantzitsua da herriak datozen urteetan izango duen norabidea adosteko, eta bitartean ezinbestekoa da etxebizitza arruntaren erabilera babestea eta erabaki itzulezinak saihestea”.
Erabakiaren helburua da etxebizitza arruntaren erabilera babestea, herritarren etxebizitza-beharrei erantzutea eta turismo-presioak herriko bizitegi-ereduan izan dezakeen eragina mugatzea. Udal-dokumentazioaren arabera, Getarian turismo-ostatuen eskaintza handia da: 44 establezimendu eta 527 plaza turistiko identifikatu dira, eta ratioa erreferentzia-indizearen gainetik dago (100 biztanleko 18 plaza turistiko daudela Getarian, erreferentziazko batez bestekoa 100 biztanleko 10 plaza denean).
Alberdik gaineratu duenez, “Getaria bizitzeko herria izaten jarraitzea da gure lehentasuna. Horretarako, etxebizitza eskuragarria, auzo-bizitza, hurbileko merkataritza eta zaintza-sareak erdigunean jarriko dituen plangintza behar dugu”. Haren hitzetan, “erabaki hau kautelazkoa eta denboran mugatua da, baina beharrezkoa da HAPO berriak gai hau behar besteko sakontasunez aztertu ahal izateko”.
Eteteak turismo-ostatu modalitate guztiei eragingo die, besteak beste, hotel-establezimenduei, apartamentu turistikoei, erabilera turistikoko etxebizitzei, logela turistikoei, aterpetxeei, nekazaritza-turismoei, landetxeei eta kanpinei. Bereziki, bizitegi-eraikinetan, beheko solairuetan nahiz goiko solairuetan kokatu nahi diren erabilerei eragingo die, baita lokal, bulego, etxebizitza edo eraikin-zati baten erabilera ostatu- edo turismo-ostatu erabilerara aldatzea dakarten jarduketei ere.
Neurriak ez die eragingo lehendik behar bezala baimenduta dauden jardueren mantentze-, segurtasun-, irisgarritasun- edo energia-eraginkortasuneko obrei, baldin eta erabilera handitzen edo intentsifikatzen ez bada. Era berean, bizitegi-erabilera arrunta berreskuratzeko jarduketak eta ostatu-erabilerarik ez dakarten obrak etetetik kanpo geratuko dira.
Getariako Udalaren arabera, erabaki honek etxebizitzarako eskubidea, hurbileko merkataritza, auzo-bizitza, zaintza-sareak eta genero-berdintasuna kontuan hartzen dituen hiri-eredu orekatua bermatzea du xede. Udalak nabarmendu du HAPO berriaren lanketak aukera emango duela etorkizuneko herri-eredua modu partekatuan eta ikuspegi integraletik lantzeko, Getaria bizitzeko herri atsegin, kohesionatu eta jasangarria izan dadin.
