Iturzaeta Herri Eskolako berritze-lanak amaitu dira.
Abuztuaren 31n amaitu ziren lanak, eta obra amaierako azken bisita irailaren 3an, ostegunean, egin zen.
Getariako Udalak Iturzaeta Herri Eskolako eraikinean egindako berritze eta konponketa lanak amaitu ditu. Jarduketaren helburua eraikinaren hainbat elementu konpontzea eta berritzea izan da, haren egoera hobetzeko eta ikastetxeko instalazioak datozen urteetarako baldintza egokietan mantentzeko.
Lanek eraikinaren kanpoaldeko hainbat elementu hartu dituzte barne, eta fatxadetan, balkoi eta terrazetan, leihoetan, alero eta kanaloi sisteman, kanpoko eskaileretan eta estalkiko beluxean, besteak beste, esku hartu da.
Fatxadak eta eraikinaren kanpoaldea
Fatxadetan hainbat konponketa egin dira, besteak beste, habe eta zutabeetako pitzadurak eta hormigoizko elementuen narriadurak konponduz. Lan horien ondoren, gainazalak garbitu eta tratatu dira, eta fatxada guztiak berriro margotu dira, diseinu eta kolore gaurkotuagoekin. Era berean, leihoen eta fatxaden arteko loturak berritu eta zigilatu dira.
Balkoi eta terrazetan ere esku-hartzeak egin dira. Hondatutako edo askatutako elementuak kendu, gainazalak garbitu eta iragazgaiztu dira, eta zeramikazko pieza berriak jarri dira. Horrez gain, fatxaden eta balkoien arteko akaberak eta uraren drainatzea hobetzeko elementuak berritu dira.
Leihoen eta leiho-ertzen inguruan ere lanak egin dira, iragazgaiztasuna eta zigilatzea hobetzeko. Aurretik zeuden silikonak kendu eta kanpoalderako zigilatze berriak jarri dira, eta leihoetako euri-uren babesa ere berritu da.
Uraren sarrerak eta kanpoko elementuak
Alero, zorroten eta kanaloi sisteman ere esku hartu da. Teilatuaren eta kanaloiaren arteko loturak egokitu dira, urak aleroen azpitik sartzea saihesteko, eta zorrotenen loturak sendotu, zigilatu eta margotu dira.
Kanpoko eskaileretan eta eraikinaren eta lurzoruaren arteko loturetan ere konponketa lanak egin dira. Eskaileretako eta atarietako gainazalak berritu eta egokitu dira, eta hainbat maila, zoladura eta zokalo berritu dira.
Bestalde, estalkiko beluxak ere berritu da, belux motorizatu berria jarriz eta eguzkitik babesteko gortinatxo mekanikoak gehituz. Terrazetarako sarbideetan ere ate berriak jarri dira, beira termikoko aluminiozko arotzeriarekin.
142.000 euro inguruko inbertsioa
Guztira, 142.000 euro inguruko inbertsioa egin da Iturzaeta Herri Eskolaren eraikina berritzeko eta hobetzeko.
Lan horiekin, ikastetxeko eraikinaren hainbat elementu berritu eta konpondu dira, haren kontserbazio-egoera hobetuz eta hezkuntza-komunitatearentzat instalazio egokiak mantentzen lagunduz.
Getariako Udalak horrelako jarduketen bidez udalerriko hezkuntza-instalazioen mantentze eta hobekuntzan inbertitzen jarraitzen du, ikasleek eta hezkuntza-komunitate osoak instalazio seguru, zaindu eta baldintza egokietan erabili ahal izan ditzaten.
