Udalak babesa eta elkartasuna helarazi dio Intza Gurrutxaga EHEko herrikideari.
Asteartean egin zen ohiko Udalbatzarrean Getariako EHE, Artzape Euskara Elkartea eta Artzape euskaldunon plazak aurkeztutako mozioa tratatu zen. Baita aurrera atera ere. Epaituak izango direnei, bereziki Intza Gurrutxaga getariarrari, babesa eta elkartasuna adierazi zitzaien. Baita herritarrak epaiketaren harira antolatu diren ekimenetan parte-hartzera animatu ere. Hona hemen mozioa:
Baionako Auzitegian epaituko dituzten EHEko kideen aldeko mozioa
Euskara hizkuntza gutxitua da, eta horren ondorioak egunero jasaten ditugu Euskal Herri osoko euskaldunok. Nolanahi ere, euskararen errealitatea desberdina da lurraldez lurralde. Lurralde batzuetan, euskarak ez du ofizialtasunik, horrek dituen ondorio guztiekin (ukazioa erakunde publikoetan, euskaraz ikasteko zailtasunak…); beste lurralde batzuetan berriz, euskara ofiziala izan arren, etengabea da gure hizkuntza-eskubideetan aurkako erasoa, eta ez dugu bermatuta, inondik inora, euskaraz bizi ahal izatea. Azken boladan, gainera, euskararen eta euskaldunon aurkako eraso bat baino gehiago ari gara ikusten, administrazioko lanpostu publikoen deialdietan hizkuntza-eskakizunak atzera botatzeko epaiak, esate baterako.
Oldarraldi-egoera horren baitan, Euskal Herrian Euskaraz-ek (EHE) desobedientzia-ekintza bat egin zuen abenduaren 3an. EHE-ko bi kidek “Justizia euskararentzat” idatzi zuten Baionako Justizia Auzitegiaren horman, eta, ondoren, eraikinaren teilatura igo ziren. Euskaldunon eskubideak aldarrikatzeko desobedientzia-ekintza hura zela-eta, Gorka Torre eta Intza Gurrutxaga getariarra atxilotu zituen Frantziako poliziak, eta, arratsean aske utzi bazituzten ere, epaiketaren zain geratu ziren.
Hain zuzen ere, apirilaren 11n izango da EHEko bi kide horien aurkako epaiketa Baionako Auzitegian, eta, epaiketaren aurrean, gure babesa eta elkartasuna adierazi nahi dizkiegu Gorka Torreri eta, bereziki, Intza Gurrutxaga herrikideari. Izan ere, euskararentzat eta euskaldunontzat justizia eskatzeagatik eta bizi dugun errealitatea agerian jartzeagatik epaituko dituzte.
Horrez gain, bi kideen aurkako epaiketaren harira antolatuko diren ekimenetan parte hartzera animatu nahi ditugu herritarrak, hala nola EHEk, “Justizia euskararentzat” lelopean, epaiketaren aurreko igandean (apirilaren 6an) Baionan antolatu duen manifestazio nazionalean.
Eman diezaiogun euskarari euskarak eman diguna! Hazi Euskara Getarian!
