MARTXAN DA GETARIAKO HAUR ETA GAZTETXOAK ARRANTZARA HURBILTZEKO EGITASMOA
Izan Arrantzale proiektuak bere jardun-eremua zabaldu du eta Getarian ezarri da, Euskal Herriko artisau-arrantzaren sektorean belaunaldien arteko erreleboa lantzeko helburuarekin.
OPEGUIk (Gipuzkoako Baxurako Arrantza Ekoizleen Elkartea), Getariako Elkano Arrantzaleen Kofradia eta Getariako Udalak lankidetza-hitzarmena sinatu dute, Izan Arrantzale proiektuaren bidez Euskadiko artisau-arrantzaren belaunaldi-erreleboa lantzeko.
Izan Arrantzale, OPEGUIk Kofradia-Itsas Etxearen bitartez bultzatutako proiektua, Getarian ezarri da, gazteenei artisautzako arrantzaren sektorea modu ludiko eta dibertigarrian hurbiltzeko helburuarekin, itsas eskulan eta esperimentuen, arrantza-tailerren eta abarren bidez.
Lankidetza hori 2024rako bi abiapuntutan oinarritzen da; lehenik eta behin, Izan Arrantzale Getariako Udalak sustatutako udalekuen programazioan sartu da, eta, beraz, uztailean zehar getariar gazteenek arrantzaz ikasiz gozatuko dute. Gainera, ikasturte hasieran, hezkuntza-eremurako beste bi jarduera espezifiko daude programatuta, udalerriko Iturzaeta Eskola Publikoarekin egingo direnak. Proiektu honen helburua da arrantzaren balio-kate osoa ikusaraztea eta belaunaldi berriei Getariako arrantza-nortasuna eta tradizioa helaraztea. Horretarako, udalerriko arrantzaleen lonja bisitatuko da, eta Elkano Arrantzaleen Kofradia izango da uztailean Izan Arrantzale programaren egoitza. Gazteak portura hurbiltzeko eta bertan dagoen jarduera ikusarazteko modu ezin hobeago bat.
