Malkorben azpiegitura berde berria sortu da, Getaria Gipuzkoako babesleku klimatikoen sarean integratuz.
Gipuzkoako Foru Aldundiko Jasangarritasun Departamentuak sustatuta, azpiegitura berde berria egokitu da Malkorbeko ezpondan, Getaria lurraldeko babesleku klimatikoen sarean txertatuz. Jarduketak 43.935,79 euroko inbertsioa izan du, eta ingurumenaren babesa, paisaiaren integrazioa eta herritarren segurtasuna hobetzea izan ditu helburu.
Azpiegitura berria aurkezteko bisitan parte hartu dute José Ignacio Asensio Jasangarritasun diputatuak, Haritz Alberdi Arrillaga Getariako alkateak eta Jakes Aguirrezabal Turismo eta Merkataritzako sailburuordeak.
Esku-hartzea Malkorbeko ezpondan egin da, portura sartzeko bidearen ondoan dagoen eta higadura, harri-jausi eta lur-mugimendu txikiak pairatzen zituen eremu sentikorrean. Lanen bidez, ezponda egonkortu eta naturaren funtzionamenduan oinarritutako bioingeniaritzako teknikak aplikatu dira, egurrezko egiturak, landare-hesi biziak eta bertako landare espezieak uztartuz.
Jasangarritasun diputatu José Ignacio Asensiok azpimarratu duenez, “azpiegitura berdeetara bideratutako euro bakoitza segurtasun, ongizate eta justizia klimatikoko inbertsioa da, bereziki klima-aldaketaren ondorioen eraginpean dauden udalerrietan”. Halaber, nabarmendu du Malkorben egindako jarduketak arriskuak murrizteaz gain ingurune bizigarriagoak sortzen laguntzen duela.
Proiektu hau Getariako Udalak sustatutako ekimen baten emaitza da. Udalak Paola Sangalli ingeniariari idazteko eskatu zion proposamena, Malkorbeko malda-eremuaren egonkortasuna eta ingurumen-egokitzapena lantzeko helburuz. Egindako hau inguru horretan gauzatutako lehen esku-hartzea izan da, eta Udalak aurreikusia du etorkizunean eremu berean beste jarduketa osagarri batzuk garatzea.
Lehen fase honek Gipuzkoako Foru Aldundiaren diru-laguntza jaso du, laguntzaren oinarriek ezartzen zuten bezala, Aldundiak berak exekutatu duelarik obra.
Jarduketa Gipuzkoan garatzen ari den babesleku klimatikoen sarearen barruan kokatzen da, klima-aldaketaren ondorioei aurre egiteko eta udalerriak erresilienteago bihurtzeko helburuarekin.
Getariako alkate Haritz Alberdi Arrillagaren hitzetan, “Malkorben egindako esku-hartze honek pauso garrantzitsua suposatzen du herriko segurtasuna eta ingurumenaren zaintza uztartzeko bidean, naturan oinarritutako irtenbideen bidez eta erakundeen arteko lankidetzari esker”.
