Getariako Udalak alde zaharreko argiteria publikoa berritzeko lizitazioa martxan jarri du.

Getariako Udalak alde zaharreko argiteria publikoa berritzeko lizitazioa abiarazi du, udalerriko 85 luminariak LED sistemara aldatzeko helburuarekin. Esku-hartze honek argiztapenaren eraginkortasuna hobetzea eta energia-kontsumoa murriztea du xede.

Proiektuak 55.000 euroko aurrekontua du, eta Udalaren Klima eta Energia Planaren barruan kokatzen da, jasangarritasunarekin eta trantsizio energetikoarekin lotutako neurriak bultzatuz.

Lan hauek gauzatuta, Getariako ia herri osoko argiteria publikoa LED sisteman egongo da. Aldaketa egiteko geratuko den gune bakarra Boulebarraren inguruko argiteria izango da, hurrengo esku-hartze baten bidez berritzeko aurreikuspenarekin.

Argiteria berritzeak ingurumen-inpaktua murrizteaz gain, energia-kontsumoan aurrezpen esanguratsua ekarriko du, eta ondorioz, udalaren gastu ekonomikoa murriztuko da epe ertain eta luzera.

Esku-hartze honekin, Getariako Udalak espazio publikoaren kalitatea hobetzen jarraitzen du, jasangarritasuna eta baliabideen erabilera arduratsua ardatz hartuta.