Euskal Herriko artelatz baso heldu bakarra da honakoa. Ez da ohikoa artelatzak Kantauri isurialdean aurkitzea, klima mediterraneoko zuhaitzak baitira, eta horregatik da berezia Getaria eta Zarautz arteko ibilbide hau.
Ezaugarriak:
- Adin guztietako aleak (landare erne-berriak, gainbehera doazenak…) egotea, bereziki baloratzen da zuhaitz handien eta zaharren presentzia.
- Hildako egurra (hildako zuhaitzak) ugari egotea, etzanda eta baita ere zutik lehortutakoak.
- Zulo, txoko ugari dituzten zuhaitzen presentzia (mikrohabitaten ugaritasuna), ugaztun txikientzako gordeleku direnak (muxar, lepahori, saguzar…).
- Intsektu xilofagoen (hildako egurjaleen) presentzia (arkanbele, rosalia urdin…).
- Egurrarekin lotutako hegaztien (okil espezie desberdinen) presentzia.
- Basopean, beste landare espezien aniztasuna (gorosti, zumalakar, zuhandor, gurbitz, elorri…).
- Ibilbidearen mapa eta informazio osagarria: Wikiloc.
Getaria herrian abiatzen da ibilbidea, eta mendiz egiten du Zarautzerainoko bidea, azkenik, bi herriak lotzen dituen itsas-bidetik itzultzeko.
Ia 12 kilometroko ibilbidea da, eta bidean hainbat geldiadi proposatzen dira, artelatzak eta haien inguruko landaredi eta animaliak ikusteko.
