Getariako arraun-ondarearen lekuko den 1911ko Kontxako Bandera zaharberritua aurkeztu da.
Getariako Udalak gaur aurkeztu du 1911ko Kontxako Banderaren zaharberritzearen emaitza, eta egindako lanen berri eman du jendaurrean. Aurkezpenean parte hartu dute Haritz Alberdi alkateak, Urko Atxotegi Getariako Arraun Elkarteko kideak eta zaharberritze-lanak egin dituen Eva Gonzalez zaharberritzaileak.
Getariak historian zehar bost Kontxako Bandera irabazi ditu. Horietatik, gaur egun gure artean kontserbatzen den bakarra 1911koa da. Horregatik, eta Kontxako Banderak arraunaren munduan duen garrantzia kontuan hartuta, bandera hau zaharberritzea erabaki da, haren kontserbazioa bermatu eta etorkizuneko belaunaldiei transmititzeko.
Denboraren joanak oihala nabarmen kaltetu duenez, zaharberritze-lanen bidez haren egoera hobetu eta etorkizunerako babesa ziurtatu nahi izan da. Helburua ez da objektu historiko bat soilik zaintzea; Getariako arraunaren historiaren eta herriaren ondare kolektiboaren parte den lekukotasun baliotsu bat babestea ere bada.
Duela 115 urte Getariako arraunlariek lortutako garaipen haren oroigarri den bandera honek, aldi berean, herriak itsasoarekin eta arraunarekin izan duen lotura estuaren erakusgarri izaten jarraitzen du. Belaunaldiz belaunaldi transmititu den ondare baten adierazpen materiala da, herriaren memoria kolektiboan leku berezia duena.
Bestalde, banderak Kontxako Banderaren beraren bilakaera ulertzeko aukera ere eskaintzen du. Gaur egungo banderekin alderatuta, 1911koaren diseinuan eta sinbolismoan alde nabarmenak antzematen dira: Espainiako banderaren koloreak dira nagusi, Donostiaren ikurrari apenas ematen zaio presentziarik eta testu guztiak gaztelaniaz ageri dira. Gaur egungo banderetan, aldiz, Donostiaren koloreek eta euskarak protagonismo handiagoa dute.
Aldaketa horiek agerian uzten dute banderak ez direla kirol-garaipen baten oroigarri hutsak. Aitzitik, garai bakoitzean botere-harremanen bidez ezarri diren balio, identitate eta ikuspegi politikoen isla ere badira. Sinboloek eta hizkuntza-hautuek erakusten dute nola botere-egiturek beren erreferenteak espazio publikoan ezarri izan dituzten, sarritan bertako errealitatearen, nortasunaren eta hizkuntzaren kaltetan.
Horregatik, 1911ko bandera hau ez da soilik Getariako arraunaren historiako garaipen garrantzitsu baten lekukoa. Garaiko gizartea, botere-harremanak, sinboloak eta hizkuntza-politikak ulertzeko aukera ematen duen ondare-elementua ere bada. Zaharberritze-lanari esker, etorkizuneko belaunaldiek Getariaren historiaren zati garrantzitsu hau ezagutu, ulertu eta balioan jartzeko aukera izango dute.
Getariako Udalaren eskariz egin dira zaharberritze-lanak, eta Eva Gonzalezek burutu ditu. Aurkezpenean nabarmendu den bezala, ondarea zaintzea ez da iragana gordetzea soilik: herri baten memoria, nortasuna eta historiari buruzko irakurketa kritikoa etorkizunera eramateko konpromisoa ere bada.
Datozen egunetan, 1911ko Kontxako Bandera ikusgai egongo da Udaleko Pleno aretoko sarreran, herritarrek eta bisitariek gertutik ezagutzeko aukera izan dezaten. Harekin batera, Getariako Udalaren esku dauden eta garai ezberdinetako arraun-lehiaketen lekuko diren beste hiru bandera historiko ere erakusgai jarri dira: Bilboko Bandera (1896), Biarritzeko Bandera (1906) eta Zarauzko Bandera (1916-1931). Erakusketa honek Getariaren arraun-ibilbide oparoaren ikuspegi zabalagoa eskaintzen du, itsasoarekin izan duen lotura estua eta belaunaldiz belaunaldi eraiki den ondarearen balioa azpimarratuz. Iraganeko garaipenak gogoratzeaz harago, herriaren memoria kolektiboa zaindu, ulertu eta etorkizunera transmititzeko gonbita ere bada.
Eta, hastear den arraun-denboraldiaren atarian, Getariako Udalak zorterik onena opa dio Esperantzari, aurten ere herriaren izena harrotasunez ordezkatu eta arraunaren bidez Getariaren izaera eta nortasuna itsasoratzen jarrai dezan.
